शिरपूर प्रतिनिधी :- शिरपूर तालुक्यातील वाघाडी गावातील वाल्मीक नगर भागात रस्त्याच्या कामावरून ग्रामस्थांमध्ये तीव्र असंतोष पसरला आहे. गेल्या सहा महिन्यांपासून रस्त्यावर ६० एमएम बोगस खडी पसरलेली असून, काम अर्धवट अवस्थेत थांबल्याने नागरिकांना अनेक अडचणींचा सामना करावा लागत आहे. याप्रकरणी ग्रामस्थांनी जिल्हा परिषदेच्या मुख्य कार्यकारी अधिकाऱ्यांकडे तक्रार अर्ज दाखल केला आहे.
रस्त्याच्या कामात ठेकेदाराची दिरंगाई:
वाल्मीक नगरमधील मुख्य रस्त्याचे काम गेल्या सहा महिन्यांपासून रखडलेले आहे. रस्त्यावर पसरलेल्या खडीमुळे नागरिकांना ये-जा करणे कठीण झाले आहे. अनेकजण दुचाकीवरून पडून जखमी झाले आहेत. शाळकरी मुलांना खेळतानाही पायांना जखमा झाल्या आहेत. महिलांनाही रस्त्यावरून चालणे त्रासदायक झाले आहे.
ग्रामस्थांनी तक्रार अर्जात रस्त्याच्या कामाचा ठेकेदार कोण आहे, याची माहिती मागितली आहे. तसेच, काम वेळेत पूर्ण न करणाऱ्या ठेकेदाराचा परवाना रद्द करण्याची मागणी केली आहे.
या कामासाठी किती निधी मंजूर झाला,तो ग्रामपंचायतीला मिळाला का,आणि तो निधी कुठे वापरला गेला,याबाबतही ग्रामस्थांनी प्रश्न उपस्थित केले आहेत. जोपर्यंत हे काम पूर्ण होत नाही, तोपर्यंत ग्रामपंचायतीला कोणतेही नवीन निधी देऊ नये, अशी मागणी ग्रामस्थांनी केली आहे.
संबंधित अधिकाऱ्यांकडे तक्रार दाखल:
ग्रामस्थांनी जिल्हा परिषदेचे मुख्य कार्यकारी अधिकारी आणि पंचायत समितीचे गटविकास अधिकारी यांच्याकडे तक्रार अर्ज सादर केला आहे. या तक्रारीवर योग्य आणि तात्काळ कारवाई व्हावी, अशी मागणी ग्रामस्थांनी केली आहे.
पुढील कार्यवाहीकडे लक्ष:
या तक्रारीवर प्रशासनाकडून काय कारवाई होते, याकडे वाघाडीतील ग्रामस्थांचे लक्ष लागले आहे. रस्त्याचे काम लवकरात लवकर पूर्ण व्हावे, अशी त्यांची अपेक्षा आहे.
सरपंच तसेच भाजपचे विद्यमान तालुकाध्यक्ष यांच्या गावातंच विकास कामांचा खोळंबा..
राज्यात तसेच केंद्रात सर्वत्र भाजपची सत्ता असतांना अश्याकामांना ब्रेक लागल्यामुळे ग्रामस्थांमध्ये चर्चा..
कोणत्याही टिप्पण्‍या नाहीत:
टिप्पणी पोस्ट करा