अमळनेर : तालुक्यातील दहिवद येथे अज्ञात चोरट्यानी तीन घरे फोडून सुमारे तीन लाख रुपयांचे सोने आणि रोख रक्कम चोरून नेल्याची घटना ४ रोजी रात्री ते ५ रोजी सकाळ दरम्यान घडली.
वअमोल रमेश महाजन यांनी फिर्याद दिली की ५ रोजी सकाळी ५ वाजता नळाला पाणी आले म्हणून वडील उठले असता त्यांना किचन मधील सामान अस्ताव्यस्त पडलेले दिसले. तेव्हा अमोलच्या आईने धान्याच्या कोठीत ठेवलेले ९ हजार रुपये किमतीचे तीन ग्रॅम सोने व ९८ हजार रुपये रक्कम तपासले असता ते मिळून आले नाही. आजूबाजूच्या लोकांना हे संगीतले असता त्यांनी माहिती दिली की गावातीलच भगवान भिवंसन माळी आणि नीता संजय वाघ हे बाहेरगावी गेलेले असताना त्यांचीही घरे फोडण्यात आली. भगवान माळी यांच्या घरातील ५० हजार रुपये रोख आणि २४ हजार रुपयांच्या ८ ग्राम सोन्याच्या बाळ्या तर नीता वाघ यांच्या घरातील ५० हजार रुपये रोख , २० हजार रुपये किमतीचे १०० ग्राम चांदीचे दागिने , १५ हजार रुपये किमतीचे ५ ग्राम मनी मंगळसूत्र, ३ हजार रुपये किमतीची १ ग्राम सोन्याची बाळी , १५ हजार रुपये किमतीच्या ५ ग्राम सोन्याच्या रिंग , १२ हजार रुपये किमतीच्या चार ग्राम सोन्याच्या कड्या , ९ हजार रुपये किमतीचे ३ ग्राम सोन्याचे डोरलं असा एकूण तिन्ही घरातील ३ लाख ५ हजार रुपये किमतीचे सोन्या चांदीचे दागिने व रोख रक्कम अज्ञात चोरट्याने चोरून नेले. घटनास्थळी पोलीस निरीक्षक विकास देवरे ,एपीआय जगदीश गावित , पोलीस उपनिरीक्षक भगवान शिरसाठ यांच्यासह पोलीस कर्मचाऱ्यांनी भेट देऊन पंचनामा केला. अमळनेर पोलीस स्टेशनला चोरीचा गुन्हा दाखल करण्यात आला असून तपास पोलीस उपनिरीक्षक भगवान शिरसाठ करीत आहेत.
कोणत्याही टिप्पण्‍या नाहीत:
टिप्पणी पोस्ट करा