भूम, शिवसेना-महायुतीच्या वतीने दि २९ रोजी उमेदवार डॉ. तानाजी सावंत यांनी २४३ भूम-परंडा-वाशी मतदारसंघातून आपला उमेदवारी अर्ज दाखल केला. या ऐतिहासिक प्रसंगी आयोजित प्रचार सभेला जनसमुदायाने भरघोस प्रतिसाद दिला. सभेत अनेक सामान्य नागरिक, ज्यात फाटक्या धोतरातील वृद्ध, तीन रंगाचे लुगडे नेसलेल्या मातेपासून ते डोळ्यांत उज्वल भविष्याची स्वप्ने घेऊन आलेली तरुणाई, सर्वांचे प्रतिनिधित्व दिसून आले.
गेल्या पाच वर्षांत जनतेने सोपवलेली विकासाची जबाबदारी यशस्वीरीत्या पार पाडल्याचे समाधान व्यक्त करताना, डॉ. सावंत यांनी पुढील काळात आर्थिक समृद्धीची 'धवल क्रांती' व 'हरीत क्रांती' सह सर्वांना समृद्ध करणारी अर्थक्रांती घडवून आणण्याचा संकल्पही त्यांनी केला. या नव्या संकल्पनेतून जनतेच्या जीवनात मोठा बदल घडवण्याचे उद्दिष्ट त्यांनी स्पष्ट केले. उपस्थित जनतेच्या उत्साहपूर्ण प्रतिसादातून त्यांनी लाखोंच्या मतांच्या फरकाने निवडून येण्याचा आत्मविश्वास व्यक्त केला.
डॉ. सावंत म्हणाले, “महायुतीच्या सर्वच वरिष्ठ नेत्यांनी माझ्यावर दाखवलेला विश्वास मला नवीन प्रेरणा देतो आहे, आणि त्यांचा विश्वास मी सार्थ ठरवीन. आपल्या या भूमीला सुजलाम-सुफलाम करण्याच्या उद्दिष्टासाठी मी अथक प्रयत्न करत राहीन.”
सभेचे सूत्रसंचालन धाराशिवचे शिवसेना जिल्हा समन्वयक गौतम लटके आणि दत्ता आण्णा साळुंखे यांनी केले. व्यासपीठावर लहुजी सेनेचे जिल्हाध्यक्ष डॉ. मारूती क्षीरसागर, रिपाइंचे भागवतराव शिंदे, मागासवर्गीय सेलचे जिल्हा उपाध्यक्ष संभाजीराव शिंदे, रिपाइंचे राज्य सरचिटणीस संजयकुमार बनसोडे, राष्ट्रवादी काँग्रेसचे विधानसभा अध्यक्ष नवनाथ जगताप, भाजपाचे विधानसभा समन्वयक बाळासाहेब क्षीरसागर, ज्येष्ठ नेते शिवाजीराव भोईटे, माजी आमदार सुजीतसिंह ठाकूर आणि जिल्हा परिषदेचे माजी उपाध्यक्ष धनंजय सावंत यांसारखे मान्यवर उपस्थित होते.
जनतेत सकारात्मक ऊर्जा व उत्साहाच्या वातावरणाने स्फुरण आणलेल्या या सभेतून महायुतीच्या उमेदवारांच्या विजयासाठी दृढ संकल्प व्यक्त करण्यात आला.
कोणत्याही टिप्पण्‍या नाहीत:
टिप्पणी पोस्ट करा