शिरपूर प्रतिनिधी:- शिरपूर शहरातील रिक्रीएशन गार्डनजवळ हार्डवेअरच्या दुकानात पत्रा उचकटून 60 हजार रुपये किंमतीचे महागडे नळ चोरुन नेणाऱ्या दोघांना शहर पोलिसांनी शिताफीने अटक केली. त्यांच्याकडून चोरीचा मुद्देमाल जप्त करण्यात आला असून शिरपूर न्यायालयाने त्यांना दोन दिवसांची पोलिस कोठडी दिली आहे.
तालुक्यातील ताजपुरी येथील रहिवासी प्रदीप किशोर शिरसाठ यांच्या मालकीचे रिक्रीएशन गार्डनजवळ बजरंग हार्डवेअर दुकान आहे.14 नोव्हेंबरची सायंकाळ ते 15 नोव्हेंबरच्या सकाळी आठदरम्यान संशयितांनी पत्रा उचकटून दुकानात ठेवलेल व्हिक्टोरिया कंपनीचे 150 नळ चोरुन नेले होते. शिरसाठ यांच्या फिर्यादीवरुन शहर पोलिस ठाण्यात गुन्हा संशयितांविरोधात गुन्हा दाखल करण्यात आला.
दरम्यान गुन्ह्याचा तपास करतांना शहर पोलिस ठाण्याचे पोलिस निरीक्षक अन्साराम आगरकर यांना शहरातील पाच कंदीलकडून खंडेराव मंदिराकडे जाणाऱ्या रस्त्यावर दोन तरूण पिशव्यांमध्ये नळ घेऊन फिरत असून विक्रीच्या प्रयत्नात असल्याची माहिती मिळाली. पोलिसांनी दोघांना शिताफीने अटक केली. सूर्यकांत तथा सोनू चंद्रकांत कलाल (वय 24, रा. रामसिंह नगर, शिरपूर) व सतीश गोविंद महाजन (वय 38, रा. वरवाडे, शिरपूर) अशी संशयितांची नावे आहेत. त्यांच्याकडून
चोरीचे 150 नळ जप्त करण्यात आले. त्यांना न्यायालयाने दोन दिवसांची पोलिस कोठडी दिली.पोलिस अधीक्षक संजय बारकुंड, अपर अधीक्षक किशोर काळे, उपविभागीय पोलिस अधिकारी सचिन हिरे यांच्या मार्गदर्शनाखाली
निरीक्षक ए.एस.आगरकर, उपनिरीक्षक संदीप मुरकुटे, शोध पथकाचे हवालदार ललित पाटील, पोलिस नाईक रवींद्र आखडमल,हवालदार विनोद आखडमल, गोविंद कोळी,योगेश दाभाडे, प्रशांत पवार, मनोज दाभाडे,
भटू साळुंखे, सचिन वाघ, मनोज महाजन,आरिफ तडवी, विजय पाटील यांनी ही कारवाई केली.
कोणत्याही टिप्पण्‍या नाहीत:
टिप्पणी पोस्ट करा